बारामतीत कोरोना विषाणू निर्मूलन आढावा बैठकीत प्रादुर्भाव नियंत्रणात न आल्यास कडक निर्बंध लागू करण्याचा विचार करावा लागेल, असं उपमुख्यमंत्री अजित पवार यांनी स्पष्ट सांगितलं.
अधिक कोरोना रुग्ण ठिकाणास हॉटस्पॉट घोषित करताना नगरसेवकांना विश्वासात घ्या आणि ग्रामीण भागात सर्वेक्षण करण्यावर भर देण्यास पुणे जिल्हा परिषदेनं ज्याप्रकारे कोरोना अपडेटसाठी ॲप तयार केले आहे; त्याच धर्तीवर बारामती तालुक्यासाठीही ॲप तयार करा. जेणेकरून कोरोनाची सद्यस्थिती आणि बेडच्या उपलब्धतेबाबत नागरिकांना माहिती मिळणं सुलभ होईल, असे निर्देश उपमुख्यमंत्री अजित पवार यांनी दिले.
अधिकाऱ्यांनी समन्वयानं काम करावं. नागरिकांपर्यंत पोहोचून कोरोनाबाबत जनजागृती करावी. ऑक्सिजन बेडची कमतरता भासणार नाही, याची दक्षता घ्यावी, असं त्यांनी सूचित केलं.
बारामती शहरात काही नागरिक मास्क वापरताना दिसत नाहीत. कोरोना प्रतिबंधात्मक नियमांचं पालन करताना दिसत नाहीत. बाजाराच्या ठिकाणी गर्दी करत आहेत. यावर प्रशासनानं कडक उपाययोजना करुन दंडात्मक कारवाई करण्याचे निर्देश दिले. सार्वजनिक ठिकाणी तसंच अन्यत्र गर्दी होणार नाही; सुरक्षित अंतर राखले जाईल, याची सर्वांनीच दक्षता घेणं आवश्यक आहे. लग्नसमारंभ व अन्य कार्यक्रमासाठी नियमानुसार लोकांची संख्या मर्यादित ठेवणं अपेक्षित आहे, याकडे विशेष लक्ष द्यावे. लसीकरणाचा वेग वाढवावा. सॅनिटायझरचा वापर करावा. कोविडशी लढण्याकरिता आवश्यक असणाऱ्या वैद्यकीय साधनसामुग्रीची चांगल्या प्रतीची खरेदी करावी. त्यासाठी निधीची कमतरता भासणार नाही, याची प्रशासनानं खबरदारी घ्यावी, असं सूचित केलं.
कोरोना संसर्गाची साखळी तोडण्यासाठी सर्वांनी गांभीर्यानं काळजी घेण्याची आवश्यकता आहे. सामाजिक अंतर ठेवणं, हात वारंवार धुणं, गर्दी टाळणं या त्रिसुत्रीवर भर देत नागरिकांनी प्रशासनाला सहकार्य करा, असं आवाहन उपमुख्यमंत्री अजित पवार यांनी केलं आहे.